Македонското еколошко друштво на Петтиот светски конгрес на биосферни резервати

Нашата м-р Даниела Заец го претставува Македонското еколошко друштво на Петтиот светски конгрес на биосферни резервати, кој од 22 до 26 септември се одржува во Хангжу, Народна Република Кина. На секои десет години, Светската мрежа на биосферни резервати се состанува за да ги утврди приоритетите, да ја зајакне соработката и да дефинира Глобален акциски план за иднината. Оваа година, повеќе од 2 000 учесници, вклучувајќи научници, креатори на политики, претприемачи и еколози, ќе се состанат за да ја обликуваат иднината на повеќе од 750 биосферни резервати под заштита на Организацијата за образование, наука и култура на Обединетите Нации (УНЕСКО) во 136 земји ширум светот. Дискусиите ќе бидат насочени кон придонесите на Светската мрежа на биосферни резервати во глобалната агенда за биодиверзитет и одржлив развој, усогласувајќи ги напорите со клучните меѓународни рамки, како што се Глобалната рамка за биолошка разновидност Кунминг-Монтреал, Парискиот договор за климатски промени и Меѓународната деценија на науката за одржлив развој.