Светскиот ден на биолошката разновидност, кој се одбележува на 22 мај, има за цел да ја истакне важноста на зачувувањето на животната разновидност на планетата како темел за здрави екосистеми и одржлив живот. Овој ден нѐ потсетува дека заштитата на биодиверзитетот е клучна за благосостојбата на луѓето и природата ширум светот. Токму затоа, овогодишното мото е: „Хармонија со природата и одржлив развој.“

Со своето исклучително природно богатство, прекуграничниот регион Преспа е жив пример за тоа колку е значајно да ги негуваме овие вредности. На овој ден, со нашите партнерски организации PPNEA од Албанија и SPP од Грција ја повторуваме и потврдуваме нашата заложба кон заштитата на нашата сакана Преспа – место на исклучителна природна убавина и биолошка разновидност, кое заслужува внимание, грижа и одржлив развој за идните генерации.

“Преспа е едно од највредните природни и културни богатства во регионот. Со своите древни езера, ретка биолошка разновидност и богата мрежа на традиции, Преспа е место каде што луѓето се стремат да живеат во хармонија со природата. Овој уникатен екосистем поврзува три држави, но уште поважно – ги поврзува луѓето со нивното живо наследство. Затоа, грижата за Преспа не е само еколошка неопходност, туку и морална обврска за сите нас” – истакнува Даниела Заец од преспанската канцеларија на Македонско еколошко друштво.