Oд осми до 13ти јули, МЕД во ко-организација со Истражувачкото друштво на студенти биолози и ПреспаНет донесе студенти-волонтери од трите држави низ кои се простира преспанскиот басен, со една цел – да се спроведат биолошки и еколошки истражувања во регионот, еколошка едукација и подигнување на јавната свест на прекугранично ниво.
За време на интензивните теренски активности истраживме кои живи организми ја населуваат планината и каде, успеавме да го пренесеме ова знаење на повеќе од триесет членови и волонтери од кои 10 учесници беа од Албанија и Грција, и забележавме што е ново за националниот парк, а што можеби веќе исчезнало. Овие податоци имаа едукативна и научна цел.
Локалитет Црвени Стени
Истражувачка активност со прекуграничен карактер ќе се организира во 2020 во рамки на проектот за заштита на преспанскиот регион во Грција во организација на колегите од здружението за заштита на Преспа од Грција.
Македонското еколошко друштво (МЕД) на 09 јули 2018 година за прв пат од своето формирање во 1972 година, својата работа и официјално ја прошири во преспанскиот регион, отворајќи регионална канцеларија во Ресен.
Отворањето на подружницата во Преспа претставува важен исчекор за нас, имајќи на ум дека ние сме активна членка и основач на прекуграничната мрежа ПреспаНет, којашто се формираше во 2013 година и од тогаш до сега спроведува акции за заштита на преспанскиот регион во Македонија, Албанија и Грција. Канцеларијата ја отвори извршната директорка на МЕД, Робертина Брајаноска, истакнувајќи ја важноста во заштитата на природата во преспанскиот регион преку прекуграничната соработка.
„Прекрасно е чувството кога заштитата на природата ќе обедини толку луѓе и нема да познава граници. Преспанското езеро и преспланскиот регион се жариште на биолошка разновидност коешто потребно е да го заштитиме за следните генерации. Се надевам дека со отворањето на оваа канцеларија нашата работа и посветеност за зачувување и истражување на Преспа ќе се интензивира и ќе наиде на добра соработка и од сите важни чинители во регионот и на национално ниво“, изјави Брајаноска.
МЕД во Преспа започна да спроведува мониторинг на крупни цицачи, мониторинг на растенија и водни живеалишта на прекугранично ниво во рамки на проектот „Прекугранична заштита на регионот Преспа преку заеднички партнерски акции на ПреспаНет“, финансиран од Фондот за природа за регионот Преспа – Охрид (ПОНТ) и Јенсен фондацијата. На настанот по повод отворањето на регионалната канцеларија се обрати и Мирјам Де Конинг, извршна директорка на Фондот за природа за регионот Преспа – Охрид (ПОНТ).
„Заштитата на природата во преспанскиот регион е наш приоритет и како финансиери сакаме да бидеме присутни долгорочно поддржувајќи ја работата на локалните невладини организации, заштитените подрачја во трите земји, како и локалното население преку активности поврзани со екотуризам и одржливо користење на природните ресурси“, изјави Де Конинг.
Во изминатите години освен мониторинг и заштита на биодиверзитетот во Преспа, МЕД развиваше и едукативни програми со училиштата во регионот, а оствари и постојана соработка со управите на националните паркови „Галичица“ и „Пелистер“, и Општина Ресен како управител на Паркот на природа „Езерани“ и споменикот на природа „Преспанско Езеро“.
Постојан координатор на регионалната канцеларија на МЕД во Ресен е Даниела Заец, раководител на проекти во МЕД.
