Одбележан Светскиот ден на желките со теренска едукативна работилница во Коњско

По овој повод, во живописното преспанско село Коњско организиравме теренска едукативна работилница со учениците од ООУ „Гоце Делчев“ од Ресен, приближувајќи им го фасцинантниот свет на желките и начинот на кој биолозите ги проучуваат овие интересни и важни влекачи.

Преку практични активности на терен, учениците се запознаа со методите што се користат за пронаоѓање, набљудување и истражување на желките, како и со различните видови што живеат во Преспанскиот Регион – блатната и шумската желба, при што фокусот овој пат беше насочен кон шумските желки. Учениците имаа можност одблизу да дознаат повеќе за нивниот начин на живот, нивната улога во природната рамнотежа и значењето од нивната заштита.

Воедно, разговаравме и за бројните закани со кои се соочуваат желките денес –климатските промени, уништувањето и фрагментацијата на живеалиштата, како и различните човечки влијанија што го загрозуваат нивниот опстанок. Со ваквите активности, најмладите не само што стекнуваат нови знаења, туку развиваат и чувство на одговорност и грижа кон природата, препознавајќи дека зачувувањето на биолошката разновидност е заедничка обврска на сите нас.

Оваа работилница беше реализирана во рамки на проектот „Иницијатива за зелена и сина Преспа - Зајакнување на заштитата преку истражување, едукација и комуникација“, финансиран од Европската Унија (ЕУ) во рамки на програмата „ЕУ за Преспа“ и кофинансиран преку Фондот за природа „Преспа - Охрид“ (ПОНТ). Партнери во имплементацијата на проектот се Македонско еколошко друштво, Општина Ресен, Националниот парк „Галичица“, Друштвото за заштита на Преспа (SPP) од Република Грција и Друштвото за заштита и зачувување на природната средина во Албанија (PPNEA) од Република Албанија. Имплементацијата на проектните активности е поддржана од Министерството за животна средина и просторно планирање на Република Северна Македонија и Националниот парк „Пелистер“.