Започна косењето на влажните ливади во Преспа

Одржливото управување со влажните ливади има исклучително значење за зачувувањето на природните вредности на Преспа. Со редовното косење се обезбедуваат поволни услови за опстанок на бројни растителни и животински видови, а воедно се поддржуваат и одржливите земјоделски и сточарски практики. Притоа, добиеното сено косењето ќе биде предадено на локални сточари и на Националниот парк „Галичица“, каде што ќе се користи за потребите на репродуктивниот центар за европскиот елен.

На тој начин, оваа активност претставува успешен пример за интегриран и цикличен систем на одржливо управување, во кој институциите, заштитените подрачја и локалната заедница заеднички придонесуваат за зачувување на природата, а придобивките повторно се враќаат кај луѓето и екосистемот.

Притоа, како дел од овогодинешните активности, ќе биде спроведена и фитоценолошка анализа, со цел преку научни методи да се следи развојот на растителните заедници и да се оцени влијанието на применетите мерки за управување врз биолошката разновидност и еколошката состојба на влажните ливади.

Одржливото управување со влажните ливади во Преспа се реализира во рамки на проектот „ПреспаНЕТ III – зачувување на биолошката разновидност на прекугранична Преспа“, поддржан од Prespa-Ohrid Nature Trust (PONT), Фондацијата Aage V. Jensen и EuroNatur.